“IDALANGIN NINYO SA DIYOS NA MAGPADALA SIYA NG MGA MANGGAGAWA SA KANYANG BUKIRIN”

“IDALANGIN NINYO SA DIYOS NA MAGPADALA

SIYA NG MGA MANGGAGAWA SA KANYANG BUKIRIN”

Liham Pastoral Blg. 2

Serye ng 2012

 Minamahal na bayan ng Diyos:

Ang kapayapaan ng Panginoong Muling Nabuhay ay sumainyong lahat!

Ang ikaapat na Linggo ng Pasko ng Pagkabuhay ay kilala bilang Linggo ng Mabuting Pastol, at itinalaga ng ating Inang Simbahan bilang Pandaigdigang Araw ng Pananalangin Para sa Bokasyon. Ang pagdiriwang na ito ay itinatag ng yumaong Papa Pablo VI noong taong 1963 bilang tugon ng Simbahan sa atas ni Hesus na taimtim na manalangin sa Ama na magpadala pa siya ng mga manggagawa para sa kaharian ng Diyos. Matatandaan natin ang isang tagpo sa Ebanghelyo ni San Mateo na kung saan si Hesus, matapos niyang makita ang napakaraming tao na lito at lupaypay – parang mga tupang walang pastol – ay labis na nahabag sa kanila. Sinabi ni Hesus: “Sagana ang anihin, ngunit kakaunti ang mag-aani. Idalangin ninyo sa may-ari ng anihin na magpadala siya ng mga manggagawa sa kanyang aanihin.” (Mt. 9:36-38)

Hindi natin maipagkakaila na isa sa mga malalaking alalahanin ng buong Simbahan sa kasalukuyan ay ang kakulangan ng mga bokasyon sa pagpapari at sa buhay relihiyoso at relihiyosa. Ayon sa ilang pag-aaral, malaki ang ibinaba ng proporsyon ng mga pari sa mga bilang ng mga binyagan dito sa ating bansa sa nakaraang mga taon. Sa ating diocesis man, bagama’t may sapat na mga programa at gawain dito upang tugunan ang pangangailangang pastoral at espirituwal ng mga mananampalataya, kapos pa rin ang bilang ng mga pari upang lubos na mapangalagaan ang kapakanan ng buong sambayanan.

Gayunpaman, batid natin ang katapatan ng Diyos sa kanyang pangako sa atin na magpapadala siya ng mga pastol na mamamahala sa kanyang bayan ng buong katalinuhan at pagkaunawa. (Jer. 3:15) Sa kabila ng napipintong “krisis sa bokasyon,” inaanyayahan tayong lahat na lubos na magtiwala sa kilos ng Espiritu Santo at sa kalooban ng Ama na siyang tumatawag at humihirang ng mga alagad ni Hesus. (Pastores Dabo Vobis 1) Kaakibat ng pananalig natin sa pangakong ito ng Diyos ay ang ating pagsasabalikat ng mahalagang pananagutan na makiisa sa pagpapalago ng bokasyon sa pagpapari at pagkarelihiyoso. Malinaw na itinuturo ng Simbahan na “nakasalalay sa buong pamayanang Kristiyano ang tungkulin ng pagpapalago ng mga bokasyon sa pamamagitan ng ganap na pamumuhay bilang mga Kristiyano.” (Optatam Totius 2) Kaya naman, habang tayo’y nananalangin sa araw na ito para sa paglago ng mga bokasyon sa Simbahan, hinihimok ko kayong lahat na italaga ang inyong sarili upang maging mga tagataguyod ng bokasyon sa ating diocesis.

Sa pagkakataong ito, hayaan ninyong ituon natin ang ating pansin ukol sa nararapat nating mga pagkilos at gawain bilang mga binyagan upang dumami ang tumugon sa bokasyon ng pagpapari at pagiging relihiyoso.

Una, manalangin para sa ikalalaganap ng bokasyon. Kung ating lilimiin ang pamamaraan ng pagtawag ni Hesus sa kanyang mga Apostol, ang paghirang niya sa mga ito ay naganap sa konteksto ng panalangin. Bago niya pinili ang kanyang mga alagad, magdamag na nanalangin si Hesus upang matanto ang kalooban ng Ama at upang ipagdasal din ang kanyang mga hinirang. (Lc. 6:12-13) Gayundin naman, ang Diyos ay tumatawag ng kanyang mga alagad sa isang nananalanging komunidad o pamilya. Ayon kay Papa Benedicto XVI, “ang bokasyon sa pagpapari at pagkarelihiyoso ay bunga ng madalas na pakikipag-ugnayan sa Diyos at maalab na pananalangin sa mga pamayanan, pangkat at pamilya.” (Mensahe para sa 2011 Pandaigdigang Araw ng Pananalangin para sa Bokasyon) Ang ating diocesis, sa pamamagitan ng Diocesan Vocations Commission, ay nagtatag ng “Prayer Warriors for Vocation.” Ang mga kasapi nito ay nangangako sa Diyos na kanilang araw-araw na ipagdarasal ang paglago ng mga bokasyon sa pagpapari at pagiging relihiyoso. Malugod kong inaayayahan ang lahat na makilahok sa araw-araw na pananalangin para sa bokasyon, at maging kasapi ng “Prayer Warriors for Vocation”.

Ikalawa, manghikayat ng mga kabataan na maglingkod sa Simbahan bilang pari o madre. Itinatagubilin din sa atin ng Santo Papa Benedicto XVI na “bigyang pansin ang mga kabilang sa pamayanan na nakararamdam ng tawag ng paglilingkod sa Simbahan. Ang Simbahan ay dapat na lumikha ng mga kalagayan at kondisyon upang tumugon nang buong puso ang mga kabataan sa tawag ng Diyos.” (Mensahe para sa 2011 Pandaigdigang Araw ng Pananalangin para sa Bokasyon) Aking ipinapamanhik sa bawat pamayanang Kristiyano, lalo na sa mga pamilya, na pukawin sa kanilang mga kabataan ang pagtugon sa tawag ng Diyos sa pamamagitan ng pagbibigay ng magandang inspirasyon at pagsaksi sa buhay pananampalataya; panghihikayat at paggabay na sundin ang kalooban ng Diyos; at pagpapalalim ng kanilang ugnayan sa kapwa at sa Diyos. Hinihiling ko rin na inyong taos-pusong suportahan ang mga gawain ng Diocesan Vocations Commission sa kanilang pag-anyaya sa mga kabataan sa ating mga paaralan at pamayanan upang sumibol sa kanila ang binhi ng bokasyon. Sa inyong tulong, magkaroon nawa ang bawat parokya at paaralan sa ating diocesis ng kahit isang seminarista mayor bilang handog natin sa dakilang pagdiriwang ng ginintuang hubileyo ng ating diocesis sa susunod na taon.

Panghuli, hinahamon tayong mga binyagan upang isabuhay ang bokasyong ipinagkaloob sa atin ng Diyos. Sa bisa ng Binyag at sa paglukob ng Espiritu Santo, ang lahat ng mga Kristiyano ay pinagkalooban ng Diyos ng pangunahing bokasyon na magmahal at maging banal. Tungkulin nating ipahayag ang paghahari ng Diyos anuman ang ating kalagayan at natatanging bokasyon sa buhay. Katulad ni Mahal na Birheng Maria na mapagpakumbabang tumugon sa tawag ng Diyos upang maging Ina ng Tagapagligtas, tahakin nawa natin ang landas ng kabanalan sa pamamagitan ng tapat at dalisay na pagsunod sa kalooban ng Diyos. At kung paano tayong naaakit sa buhay at pagkatao ni Maria, makaakit din nawa ng mga kabataang maglilingkod sa Diyos ang ating tapat na pagsasabuhay ng ating mga bokasyon.

Sa pagdiriwang natin ng Pandaigdigang Araw ng Pananalangin para sa Bokasyon, maging bukas nawa ang ating isip at puso upang tayo’y makinig at tumalima sa tinig ng Mabuting Pastol, na “magdadala sa atin patungo sa buhay na masagana at ganap.” (Jn. 10:10) Sa tulong ng panalangin ng La Virgen Divina Pastora, ang Ina ng Mabuting Pastol, magbunga nawa ang ating mga panalangin at pagkilos upang patuloy na magpadala ang Diyos ng mga pastol na mangangalaga sa kanyang bayan.

Ipinagtatagubilin naming basahin ang Liham Pastoral na ito sa lahat ng mga pagdiriwang ng Salita ng Diyos at Banal na Misa ngayong Sabado at Linggo, ika-28 at ika-29 ng Abril 2012.

Nilagdaan sa Tanggapan ng Obispo ng Cabanatuan sa Lunsod ng Cabanatuan ngayong ika-25 ng Abril 2012, sa Kapistahan ni San Marcos Ebanghelista.

+SOFRONIO A. BANCUD, SSS, DD

Obispo ng Cabanatuan

Read More

PANALANGIN PARA SA BOKASYON

PANALANGIN PARA SA BOKASYON

(Darasalin matapos ang pakikinabang sa pagdiriwang ng Linggo ng Mabuting Pastol, 29 April 2012)

Ama naming makapangyarihan,

isinugo mo ang iyong bugtong na Anak

upang tubusin kami sa kasalanan

at ipalaganap ang iyong paghahari sa lupa.

Padaluyin mo ang iyong biyaya sa aming mga puso

upang maganap namin ang pangunahing bokasyon

na maging banal at kalugod-lugod sa iyong paningin,

at maging mga saksi

ng iyong walang maliw na pag-ibig.

Umusbong nawa sa aming Simbahan

ang mga bokasyon ng pagtatalaga at paglilingkod.

Pagpalain mo itong aming parokya

at ang aming diocesis

ng mas marami pang kabataan

na tutugon sa iyong tawag upang maglingkod

bilang mga pari, relihiyoso at relihiyosa.

Magpadala ka pa ng mga hinirang

na mangunguna sa amin

sa pagsamba sa Iyo at paglilingkod sa kapwa.

Maging bukas nawa ang kanilang puso

sa Iyong banal na tawag

nang makasunod sila sa iyo

ng may pag-ibig at kagalakan.

Hinihiling namin ito sa pamamagitan ni Hesukristo

kasama ng Espiritu Santo magpasawalang hanggan.

AMEN.

Mahal na Birheng Divina Pastora, ipanalangin mo kami.

San Nicolas de Tolentino, ipanalangin mo kami.

San Juan Maria Vianney, ipanalangin mo kami.

Read More

Custodia di Terra Santa

Dear Brothers and Sisters in Christ!

Happy Easter to all!

I am very happy to convey to you that our humble request to the Franciscan Custody of the Holy Land for the relic of St. Joseph is granted. This is a blessing from the Lord and a manifestation of St. Joseph’s favor to all of us.

This will certainly bring spiritual blessings to our parish community. Thank you very much for the prayers. May God bless us all!

Fr. Jose Salvador D. Mallari

Parish Priest 

Custodia di Terra Santa

Segreteria - Comunicazioni

Peace and Good!

Dear F. Jose, we received your email. We will send you ASAP a relic of the house of St. Joseph. Greetings.

F. Silvio R. De La Fuente ofm

Segretario di Terra Santa

Segreteria Custodiale | Saint Saviour’s Monastery | St. Francis 1 | P.O.B. 186 | 91001 | tel: +972 2 6266563 | fax: +972 2 6284717 

Twitter: @cts_notizie @cts_noticias | Facebook: Custodiaterrasanta

Read More

Si Kristo’y Muling Nabuhay, Aleluya, Aleluya!

Maligayang Pasko ng Pagkabuhay sa inyong lahat!

Sumapit na tayo sa tugatog ng ating pananampalataya na ating pinaghandaan noong Panahon ng Kuwaresma at ating ginunita nitong mga Mahal na Araw-ang Pagkabuhay na Mag-uli ng ating Panginoong Hesukristo! Isa ito sa mga pinakamasayang okasyon sa ating simbahan sapagkat dito nasasalig ang ating pananampalataya. 

Ngayong Linggo ng Pagkabuhay narinig natin ang salaysay tungkol sa libingang walang laman. Para kina Maria Magdalena, Simon Pedro at alagad na mahal ni Jesus sapat na ang libingang walang laman upang maniwala sila na si Jesus ay muling nabuhay.
Para sa ating mga Kristiyanong Katoliko hindi na mahirap tanggapin at paniwalaan na si Kristo’y muling nabuhay. Para sa iba, hangang ngayon isa pa itong problema at palaisipan. Ngunit para sa mga sumasampalatayang tulad natin isa itong hiwaga na dapat isabuhay.

Paano ba natin maisasabuhay ang Muling Pagkabuhay ni Jesus?

Una, maisasabuhay natin ang Muling Pagkabuhay ni Jesus sa pamamagitan ng palagiang paghahangad kay Jesus. Si Maria Magdalena ang huwaran natin dito. Mahal na mahal niya si Jesus na kanyang kaibigan at Panginoon, kaya madaling araw pa’y nagpunta siya sa libingan upang pahiran ang bangkay ng Panginoon. Hanggang sa kamatayan mahal na mahal niya ang Panginoon. Lagi sana nating ingatan na huwag matabunan ng iba pang mga paghahangad sa buhay ang paghahangad natin kay Jesus. Siya sana ang palagi nating unahin, dahil palagi tayong una sa puso Niya.

Ikalawa, maisasabuhay natin ang Muling Pagkabuhay ni Jesus sa pamamagitan ng paglilingkod. Ang paghahangad natin kay Jesus ay dapat magbunga sa atin ng paglilingkod. Hindi sapat na mahal lang natin si Jesus. Kailangang magbunga ng mabubuting gawa ang paghahangad natin sa Kanya. Dapat tayong maging tagapagbalita ng muling pagkabuhay ni Jesus sa pamamagitan ng ating mabubuting halimbawa tulad ng pagkakaisa at pagbabahaginan . Hindi makikitang muling nabuhay si Jesus sa isang tahanan o pamayanan na nagkakanya-kanya at walang pakialaman. Nakikita na buhay nga si Jesus kapag tayo’y may malasakit at pakialam sa bawat isa.

Ikatlo, maisasabuhay natin ang Muling Pagkabuhay ni Jesus sa pamamagitan ng pagiging masayahin. Biyaya ng muling pagkabuhay ni Jesus ang tuwa ang galak. Biyaya nga ito, pero kailangan nating piliin araw-araw na maging masaya sa kabila ng lahat ng ating pinagdadaanan. Nasa pagpapasya natin kung magiging masaya o malungkot ang buhay natin. Tandaan natin nagapi na ni Jesus ang lahat, pati kamatayan at kadiliman. Makihati tayo sa kanyang saya. Piliin natin na palaging maging masaya. Ang Diyos natin ay Diyos ng pagsasaya. Hindi natapos ang buhay Niya sa Biyernes Santo! Nabuhay na Siya, kaya bumangon na tayo sa pagkakalugmok!

Ang Muling Pagkabuhay ni Hesus ay magpa-igting nawa ng ating paghahangad sa Kanya, magtulak nawa sa atin sa paglilingkod, at magpasaya nawa sa atin araw-araw. Tayong lahat ang bumubuo ng Sambayanan ng Muling Pagkabuhay. Bilang bahagi nito palagi natin Siyang hangarin at masaya natin Siyang paglingkuran. Maligayang Pasko ng Pagkabuhay sa inyong lahat!

Read More